له‌ یادی ( قازی محه‌مه‌د ) دا

 

قازى محه‌ممه‌د، کوڕى قازى عه‌لی، له‌ بنه‌ماڵه‌یه‌که‌ ناوبانگى له‌ شارى مه‌هاباد بۆ چوار سه‌ده‌ پێشتر ده‌گه‌ڕێته‌وه‌ که‌ نه‌ک ته‌نیا له‌لاى خه‌ڵک به‌ڵکو له‌لایه‌ن ده‌سه‌ڵاتداران و به‌رپرسانى حکوومه‌تیش، جێگه‌ى رێز و پێ زانین بوون، چونکه‌ بنه‌ماڵه‌یه‌کی زانا و ئازادیخواز و نیشتمانپه‌روه‌ر بوون. 
قازى عه‌لى باوکی، له‌ ساڵی 1930 دا له‌شاری مه‌هاباد رێکخراوێکى کوردى به‌ ناوى بزووتنه‌وه‌ى ( محه‌مه‌د ) پێک هێنا. ناوبراو له‌گه‌ڵ جووڵانه‌وه‌ى ( شێخ محه‌مه‌د خیابانى ) له‌ ته‌ورێز په‌یوه‌ندى هه‌بوو، تا ساڵى 1934یش که‌ کۆچیدوایى کرد له‌سه‌ر ئه‌و کاره‌ به‌رده‌وام بووه‌ .
قازى عه‌لی، دوو کوڕى هه‌بووه‌، یه‌کیان ئه‌بوالقاسم قازى ناسراو ( سه‌درى قازی ) بووه‌ که‌ دوو ده‌وره‌ له‌ لایه‌ن خه‌ڵکه‌وه‌ کراوه‌ته‌ نوێنه‌رى په‌رله‌مان و جێی بڕوا و کاریگه‌رێتى تایبه‌تى هه‌بووه‌. دواى ته‌واوبوونى کارى په‌رله‌مان له‌سه‌ر ڕاسپارده‌ى باوکی، بۆ ڕاپه‌ڕاندنى کاره‌ سیاسییه‌کان و یاریدانى خه‌ڵک هه‌ر له‌ تاران مابۆوه‌.
قازى محه‌ممه‌دیش که‌ ساڵى 1900 دا له‌و بنه‌ماڵه‌ دا له‌دایک بووه‌. قازى محه‌ممه‌د له‌ منداڵى و لاوى دا زۆر خولیاى زانست و فێر بوونى زمانه‌ بیانیه‌کان بووه‌ و جگه‌ له‌ عه‌ره‌بى و فارسی، له‌گه‌ڵ زمانى فه‌ره‌نسى و ئینگلیزى و تا ڕاده‌یه‌کیش ڕوسى ئاشنایه‌تى کردووه‌. قازى محه‌ممه‌د زۆرى حه‌ز به‌ تێکه‌ڵاوى له‌گه‌ڵ‌ زانایانى سه‌رده‌م، که‌سایه‌تییه‌ گه‌وره‌کان، کوردانى نیشتمانپه‌روه‌ر و سه‌رۆک عه‌شیره‌ته‌کان هه‌بووه‌ .

 

کردنه‌وه‌ی یه‌که‌مین خوێندنگای کچان 
دواى کۆچیدوایى باوکی، بوو به‌ دادوه‌ر( قازی ) ى شار. له‌به‌ر ئاره‌زووى خۆى بۆ کارى فه‌رهه‌نگى و بره‌ودان به‌ ئاستی زانیاری و تێگه‌یشتنی خه‌ڵک، له‌ ساڵه‌کانى به‌ر له‌ 1941 و دواى ئه‌وه‌ش به‌رپرسیارێتى فه‌رمانگه‌ی فه‌رهه‌نگ و ئه‌وقافى شارى مه‌هابادى له‌ ئه‌ستۆوه‌ گرتووه‌ و خزمه‌تى به‌رچاوى فه‌رهه‌نگى کردوه‌ و له‌ کاتى به‌رپرسیارێتی ئه‌ودا، یه‌که‌م قوتابخانه‌ى کچان له‌ مه‌هاباد کراوه‌ته‌وه‌. هه‌ر له‌به‌ر ئه‌وه‌ له‌گه‌ڵ‌ زۆرێک له‌ خوێندکاران، رۆشنبیران و مامۆستایان په‌یوه‌ندى نزیکى بووه‌ .

 

رۆڵی سه‌ره‌کی له‌ چاره‌سه‌رکردنی کێشه‌ی عه‌شایری 
له‌ماوه‌ی چه‌ند ساڵی نائارامی و نا ئاسایشی ده‌وڵه‌تى ناوه‌ندی تاران، واته‌ له‌ ساڵانی 1941 تا 1945 که‌ تێیدا کۆمارى کوردستان دامه‌زراوه‌، رۆڵێکی گرنگ و به‌رچاوی هه‌بووه‌ له‌ به‌ڕێوه‌بردنی کاروباره‌ کۆمه‌ڵایه‌تییه‌کان و به‌تایبه‌تیش له‌ چاره‌سه‌رکردنی کێشه‌ عه‌شایرییه‌کاندا . زۆر له‌ گرفته‌کانى کارى ڕۆژانه‌ى خه‌ڵک له‌ دیوانى ئه‌ودا که‌ مه‌حکه‌مه‌یان پێ‌ ده‌وت، چاره‌سه‌ر ده‌کرا . 
قازى محه‌ممه‌د ڕێزى تایبه‌تى بۆ دامه‌زرێنه‌رانى ( کۆمه‌ڵه‌ى ژیانه‌وه‌ى کورد ) (ژ.ک) هه‌بووه‌. زۆر له‌ دامه‌زرێنه‌رانى ژ.ک ڕاوێژیان له‌گه‌ڵ کردووه‌ و زۆریان خۆش ویستوه‌ و گه‌لێکیان هه‌وڵ له‌گه‌ڵ‌ داوه‌ تا ببێته‌ ئه‌ندامى ئه‌و کۆمه‌ڵه‌ . هاوکات نوێنه‌ر و میوانه‌ بیانییه‌کانیش که‌سایه‌تی قازی محه‌مه‌دیان به‌رز نرخاندووه‌ . 

 

قازی محه‌مه‌د وه‌ک که‌سایه‌تی 
قازى محه‌مه‌د مرۆڤێکى فه‌رهه‌نگ دۆست، خۆش به‌یان، ئه‌ده‌ب و هونه‌ر دۆست، ئه‌هلى راوێژ و له‌ هه‌مانکاتدا خه‌باتگه‌رێکى نیشتمانپه‌روه‌ر و گه‌ل خۆشه‌ویست بوو. له‌گه‌ڵ هه‌موو چین و توێژێک هه‌ڵسوکه‌وتى هه‌بوو و له‌ کاتى پێویستدا له‌ هه‌ست و هێزیان که‌ڵکى وه‌ر ده‌گرت .
وه‌ک ئه‌وه‌ى له‌ وه‌سیه‌ته‌که‌یدا هاتوو، قازى محه‌ممه‌د برایه‌تى و یه‌کگرتوویى کوردى پێ گه‌وره‌ترین هۆى سه‌رکه‌وتن بوو. هه‌ربۆیه‌ له‌ زۆربه‌ى وتاره‌کانى که‌ له‌ ڕۆژنامه‌ى کوردستان، ئه‌وکات چاپ کراون له‌سه‌ر بابه‌تى یه‌کیه‌تى و برایه‌تى دواوه‌ و مه‌رجى سه‌رکه‌وتن و کۆڵه‌که‌ى ڕاگرتنى کۆمار و هۆى سه‌رکه‌وتن به‌سه‌ر دوژمنانیدا زانیوه‌ .
هه‌رچه‌ند ده‌یزانى دوژمنه‌کانى کورد ڕاست ناکه‌ن به‌ڵام له‌ وتووێژدا زۆر به‌ ڕاشکاوى ڕایده‌گه‌یاند کورد حه‌ز ده‌کا له‌ ڕێگاى ئاشتییه‌وه‌ به‌ مافى خۆى بگا، به‌ڵام ئه‌گه‌ر وا نه‌بێ ئه‌وه‌ى بۆى بکرێ ده‌یکات.
به‌ر له‌ دامه‌زراندنی کۆماردا جاربه‌جاره‌ له‌ رۆژنامه‌ى کوردستان به‌ ناوى پێشه‌وا باسى لێ ده‌کرا، له‌ دواى دامه‌زرانى کۆمار به‌ شێوه‌ى فه‌رمى نازناوى پێشه‌واى پێبه‌خشراو و ئه‌و ناوه‌ تا ئێستاش له‌نێو کۆڕ و کۆمه‌ڵى خه‌ڵک دا هه‌ر باوه‌ .

 

دامه‌زراندنی کۆماری کوردستان  
قازى محه‌ممه‌د که‌ بوو به‌ ئه‌ندامى کۆمه‌ڵه‌ى ژ.ک و ناوى نهێنى بینایى بۆ دانرا، هیوایه‌کى زیاترى بۆ به‌رپرسان و خه‌ڵک پێک هێنا. له‌ ئاکامى تێگه‌یشتنى به‌ وه‌خت و ئازایه‌تى سیاسى ئه‌و و به‌ قه‌ناعه‌ت گه‌یشتنى به‌رپرسانى کۆمه‌ڵه‌دا بوو که‌ ژ.ک بوو به‌ حیزبى دیموکراتى کوردستان و وه‌ک حیزبێکى دیموکرات و پێشکه‌وتوو ده‌ستى کرد به‌ تێکۆشان و خه‌باتى سیاسی. قازى له‌به‌ر ڕێزى تایبه‌تى که‌ بۆ ژ.ک‌ى هه‌بوو، بناغه‌ى دامه‌زرانى حیزبى دێموکراتیشى هه‌ر به‌ ٢٥ى گه‌لاوێژ، ڕۆژى دامه‌زرانى ژ.ک دانا و هه‌ر بۆیه‌ش سه‌رنجى زۆربه‌ى نزیک به‌ ته‌واوى به‌رپرسانى بۆ تێکۆشان له‌ نێو حیزبى دیموکراتى کوردستاندا ڕاکێشا و به‌ هه‌ڵسه‌نگاندنی هه‌ستی کوردایه‌تی و نه‌ته‌وه‌ییبوونی کورد، پێشکه‌وتنی به‌رچاوی تۆمارکرد . 
 له‌ یه‌که‌م کۆنگره‌دا، له‌ 22ی کانوونی دووه‌می 1946 واتا ( 2ی رێبه‌ندانى 1324ى هه‌تاوی ) به‌ به‌شداریى نوێنه‌رانى پارچه‌کانى دیکه‌ى کوردستان و مه‌لا مسته‌فا بارزانى و سه‌رۆک عه‌شیره‌ت و نوێنه‌رانى زۆربه‌ی چین و توێژه‌کانى کوردستان پێکهاتنى یه‌که‌م کۆمارى کوردستان ڕاگه‌یێندرا .
له‌ ماوه‌ى ده‌سه‌ڵات‌داڕى کۆمارى کوردستان ئه‌وه‌ى پێویست بوو زۆر به‌ ڕاشکاوى به‌ شاى ئێران و قه‌وام (سه‌رۆک وه‌زیرانى کاتى ئێران) ڕاگه‌یاندوه‌، قامکى له‌سه‌ر لاوازییه‌کانیان به‌رانبه‌ر به‌ گه‌لى کورد داناوه‌. به‌ ئاشکرا پێى گوتون، ئێوه‌ له‌ قسه‌کانى خۆتان‌دا دوودڵن و ناتانه‌وێ مه‌سه‌له‌ى کوردستان چاره‌سه‌ر بکه‌ن.
کاتێک پێشه‌وا له‌لایه‌ن قوام السلتنه‌وه‌ بۆ تاران بانگهێشت ده‌کرێ و له‌ ڕێکه‌وتى 28ى حوزه‌یرانی 1946 دا ده‌چێته‌ تاران، له‌لایه‌ن ژماره‌یه‌ک له‌ وه‌زیران، نوێنه‌رانى په‌رله‌مان و نوێنه‌رى کورده‌کانى تاران و نوێنه‌رى حیزبه‌کان و یه‌کێتى کرێکاران له‌ فڕۆکه‌خانه‌ پێشوازى لێ ده‌کرێ.
له‌و سه‌رده‌مه‌ ڕۆژنامه‌ى ( ایران ما ) له‌سه‌ر ئه‌و سه‌ردان و پێشوازییه‌ نوسیبووی :" ئێستا که‌ قازى محه‌ممه‌د له‌ تارانه‌ و ئازادیخوازان چاویان پێى که‌وتووه‌، ده‌رده‌که‌وێ که‌ بیر و ڕاى ئه‌و جێگیرکردنى ئازادى و دیموکراسى له‌ ته‌واوى ئێران دایه‌ و مافى کۆمه‌ڵایه‌تى و سیاسى و مرۆیی بۆ نه‌ته‌وه‌ى کوردیش له‌ گۆڕێ دایه‌. هه‌ر کارێک به‌ سوودى دیموکراسى بێ له‌لایه‌ن پێشه‌واى کوردستانه‌وه‌ به‌ دڵه‌وه‌ پێشوازى لێ ده‌کرێ. هیوادارین جه‌نابى قه‌وام له‌و سه‌فه‌ره‌ مێژووییه‌ که‌ڵک وه‌رگرێ ."

 

دادگایى کردنى قازی
رۆژی 6ى ڕێبه‌ندانى هه‌مان ساڵ (١٣٢٥هه‌تاوی- ١٩٤٧زایینی ) لیژنه‌یه‌کى تایبه‌ت که‌ له‌ تارانه‌وه‌ به‌ سه‌رۆکایه‌تى سه‌رهه‌نگ ( غوڵام حسێن عه‌زیمى ) ده‌گه‌نه‌ مه‌هاباد و دادگا ڕێده‌خه‌ن . پرسیاره‌کانى دادگا ڕوون نه‌بوون. له‌لایه‌ن قازیه‌کانه‌وه‌ ( قازى محه‌ممه‌د، سه‌در قازی، سه‌یف قازی ) هه‌موو تاوانه‌کان ڕه‌د کرایه‌وه‌ و داواى به‌ڵگه‌یان ده‌کرد. ئاشکرا بوو که‌ ئه‌و دادگا هیچ به‌ڵگه‌یه‌کى به‌ ده‌سته‌وه‌ نه‌بوو .
له‌و سه‌رده‌مه‌دا ئێران به‌ تاوانی سه‌رهه‌ڵدان و پارچه‌کردنی وڵات و چه‌ند تۆمه‌تێکی تر قازی محه‌مه‌دیان تاوانبار کردبوو، دواجار دادگاکه‌ی ئێران بڕیاری سێداره‌ی به‌سه‌ر هه‌رسێکیاندا سه‌پاند .  قازییه‌کان بۆ ماوه‌ى سێ مانگ دوای ئه‌و دادگاییکردنه‌ له‌ به‌ندیخانه‌ به‌ندکران و تا دادگاى پێداچوونه‌وه‌‌ به‌ڕێوه‌ چوو، که‌ ئه‌مه‌ش هیچ شتێکی له‌و بڕیاره‌ نه‌ده‌گۆڕی و ته‌نیا بۆ درێژه‌دان بوو به‌ وه‌ختی له‌ سێداره‌دانیان . 

 

ئێمه‌یان فریودا با که‌س فریو نه‌خوات 
پێشه‌وا و هاوڕێیانى ئه‌وه‌نده‌ى له‌ ماوه‌ى یازده‌ مانگى کۆماردا هه‌وڵیاندا، هه‌ر ئه‌وه‌نده‌ش له‌و دادگا بوو، له‌ خۆبردوویى و ئازایه‌تییان له‌ خۆیان نیشان داوه‌ . له‌گه‌ڵ هه‌موو ئازارى ده‌روونى و ئه‌و ژیانه‌ تاڵه‌ى که‌ له‌ به‌ندیخانه‌ى پادگانى مه‌هاباددا بۆیان پێک هاتبوو، نه‌ ته‌نیا بڕوایان به‌ ئامانجه‌کانیان، لاواز نه‌ببوو به‌ڵکو زۆر ئه‌رخه‌یانترو به‌ وره‌تر ببوون .
له‌ چاوپێکه‌وتنێکى نهێنیدا له‌گه‌ڵ یه‌ک دوو مرۆڤى جێى باوه‌ڕى خۆیان وتوویانه‌:" ئێمه‌یان فریودا، با نه‌ته‌وه‌ى کورد فریو نه‌خوا و خه‌باتى خۆى بۆ ڕزگارى و سه‌ربه‌ستى درێژه‌ بدات و چه‌ک دانه‌نێ . "
ئازایه‌تییان له‌ دادگاکاندا به‌ ڕاده‌یه‌ک بووه‌ که‌ ئه‌فسه‌ره‌کان سه‌ریان سوڕماوه‌. له‌ ڕاستیدا ئه‌و دادگایه‌ ئه‌مه‌ریکا و ئینگلیزیشى له‌ پشت بوو. هه‌رچه‌ند جگه‌ له‌ کاربه‌ده‌ستانى خۆیان که‌سى نامۆى لێ نه‌بووه‌، به‌ڵام هه‌ر له‌ رێگاى ئه‌وانه‌وه‌ زۆر شت بڵاو بۆته‌وه‌ که‌ پێویسته‌ بیزانین.
ڕۆژنامه‌ى ئازادى که‌ له‌و سه‌رده‌مدا له‌ به‌غدا به‌ زمانى کوردى ده‌رده‌چوو، سه‌باره‌ت به‌ پشتگیریى ئه‌مه‌ریکا و ئینگلیز له‌و دادگایییه‌ نوسیبووی: "ئیستێعمارى ئینگلیس و ئه‌مریکا له‌ وجوودى قازى محه‌ممه‌د و هاوڕێکانیدا دوژمنى هه‌ره‌ سه‌رسه‌ختى خۆیان ده‌دی. هیوایان هه‌بوو بتوانن به‌ چۆکیان دابێننو له‌ به‌ندیخانه‌ش نوێنه‌ره‌کانیان چوون له‌گه‌ڵ‌یان دوان تا بتوانن بۆ لاى خۆیانیان ڕابکێشن، به‌ڵام هیچ کات سه‌رکه‌وتوو نه‌بوون ."
دواتر ڕۆژنامه‌ى ئازه‌ربایجان له‌ باکۆ نوسیبووى قازى محه‌ممه‌د به‌ نوێنه‌رى ئه‌مه‌ریکا ( جورج ئالێن ) ى گوتبوو:" گه‌لى کورد چاوه‌ڕوانى هیچ چاکه‌یه‌کى له‌ وڵاتانى ئیستێعمارى نیه‌ ."
نه‌جه‌فقولى پسیان وته‌کانى پێشه‌وا له‌ دادگادا له‌ چه‌ند رسته‌دا کورت ده‌کاته‌وه‌ و ده‌نووسێ: "له‌ کاتى دادگاییدا قازى محه‌ممه‌د په‌لامارى ده‌برده‌ سه‌ر سیاسه‌ت و ئاکارى ده‌وڵه‌تى تاران و ده‌یگوت: من له‌ قوژبنى گرتووخانه‌وه‌ ده‌نگى خۆم به‌رز ده‌که‌مه‌وه‌ له‌ دژى ده‌وڵه‌تى تاران و سه‌رۆکه‌کانى و ده‌ڵێم تاوانبار ئێوه‌ن نه‌ک ئێمه‌. ئێوه‌ وڵاتتان لێ داگیرکردووین ." 
له‌ به‌ڵگه‌ و رۆژنامه‌کانى یه‌کیه‌تى سۆڤیه‌ت زۆر شت له‌م بابه‌تانه‌ نووسراون. له‌ زمانی ئه‌فسه‌ره‌ ئێرانییکانه‌وه‌ ده‌گێڕنه‌وه‌ که‌ قازى له‌ جوابى ئه‌وه‌ى که‌ کۆمارى مه‌هاباد ده‌ستنیشانى سۆڤیه‌ت بووه‌ گوتویه‌:" ئه‌و ڕووداوانه‌ له‌ ئاکامى ئه‌وه‌ى دابوون که‌ ئێوه‌ خۆتان قانوونى بنه‌ڕه‌تیتان له‌ ژێر پێ ناوه‌. ئێستاش من ته‌نیا خۆم دامه‌زرێنه‌رى دێمۆکراسیه‌ت له‌ کوردستانم و هیچ هێزێکى بێگانه‌ منى هان نه‌داوه‌. بێبه‌شى کورد منى بۆ به‌ڕێوه‌بردنى ئه‌و کارانه‌ هان داوه‌. "
کاتێک سه‌رۆکى دادگا به‌ خه‌یانه‌ت تاوانباریان ده‌کا له‌ وه‌ڵام دا ده‌ڵێ:"ئێره‌ ماڵى منه‌، خاکى کوردستان خاکى باب و باپیر و ئه‌جدادى منه‌ چۆن ده‌توانم ده‌ستى لێ هه‌ڵگرم ."
دادگایى یه‌که‌م له‌ 19ى مانگى حوزه‌یران ده‌ستى پێکرد و چه‌ند رۆژى خایاند و حوکمى سێداره‌ی قازییه‌کانى دا. دادگایى دووهه‌م له‌ 28ى مارسى 1947 ( واته‌ 7ى خاکه‌لێوه‌ ) ده‌ستى پێ‌کرد و رۆژى 30ى ئادار کۆتایى پێهات .

 

ساتی سێداره‌ 
له‌ به‌ره‌به‌یانى 10ى خاکه‌لێوه‌ى ساڵى 1326ى هه‌تاوی ( 30ی ئاداری 1947 )دا پێشه‌وا قازی، حه‌مه‌ حسێن خانى سه‌یف قازی ( ئامۆزاى پێشه‌وا ) و ئه‌بولقاسم سه‌در قازی ( براى پێشه‌وا ) له‌دوای پشتڕاستکردنه‌وه‌ی بڕیاری له‌ سێداره‌دانیان له‌ دوو دادگاى نایاسایى و فه‌رمایشیدا به‌ده‌ستى دوژمنانى گه‌لى کورد له‌ چوارچراى شارى مه‌هاباد، واته‌ هه‌ر له‌و شوێنه‌ى که‌ 2ى رێبه‌ندانى 1324یهه‌تاوى ( 22 مانگى حوزه‌یرانی 1946 )دا  کۆمارى کوردستانی لێ راگه‌یه‌ندرابوو، له‌ سێداره‌ دران . 
که‌ ئه‌مه‌ش ئاشکراترین په‌یامێکی ئه‌و دوژمنانه‌ی کورد بوو بۆ چاوتۆقێنکردن و بێ هیواکردنی گه‌له‌که‌مان له‌ ئاست شۆڕش و سه‌رهه‌ڵدان و راپه‌ڕین له‌دژی داگیرکه‌راندا . 

 

چاوم مه‌به‌ستن 
هه‌ڵسوکه‌وتى قازى کاتى له‌ سێداره‌‌دران که‌ رۆژنامه‌نووسێکى ده‌ربارى شا ده‌یگێڕێته‌وه‌، ئه‌و رۆژنامه‌نووسه‌ی شا ده‌گێڕێته‌وه‌ که‌ قازى له‌ پێش‌دا داوا ده‌کات که‌ گولــله‌بارانى بکه‌ن چونکه‌ له‌ سێداره‌‌دان ئایینى نیه‌، به‌ڵام ڕێگه‌ى پێ ناده‌ن. پاشان وه‌سیه‌تنامه‌یه‌ک ده‌نووسێت که‌ جێگه‌ى سه‌رنجه‌ له‌ بارى کۆمه‌ڵایه‌تیه‌وه‌ و له‌ بارى سیاسیه‌وه‌. قازى ‌ئه‌و مردنه‌ى به‌ سه‌رکه‌وتن ده‌زانێ و هه‌ر بۆیه‌ به‌ (7) هه‌نگاو ڕێگه‌ى بۆلاى سێداره‌که‌ پێوا. له‌ پاى سێداره‌ ڕێگه‌ى نه‌دا چاوى ببه‌ستن و ده‌ڵێت:"حه‌ز ده‌که‌م له‌ ئاخرین چرکه‌ى ژیانیشم دا به‌ سه‌ربه‌رزى و چاوى کراوه‌وه‌ له‌ نیشتمانى خۆشه‌ویستم بڕوانم." و ته‌ماشای په‌تبه‌ده‌ستانی ده‌کات و ده‌ڵێت :" ئێوه‌ قازى محه‌ممه‌دێک ده‌کوژن، به‌ڵام بزانن له‌ هه‌ر تنوکه‌ خوێنێکى من، قازى محه‌ممه‌دێکى دیکه‌ شین ده‌بێته‌وه‌. داوا له‌ گه‌لى کورد ده‌که‌م خه‌باتى خۆى له‌پێناو ڕزگاریى کوردستان دا په‌ک نه‌خات، باوه‌ڕ به‌ ده‌وڵه‌تى خۆفرۆشى تاران مه‌که‌ن. بژى کورد و کوردستان ."
ته‌رمى ئه‌و شه‌هیدانه‌ هه‌ر ئه‌و رۆژه‌ له‌سه‌ر شان و پیلى خه‌ڵکى نیشتمانپه‌روه‌ری شاری مه‌هاباد له‌ گۆڕستانى مه‌لا جامى به‌ خاکى نیشتمانه‌که‌یان سپێردران. شوێنى گۆڕه‌که‌یان ئێستاش له‌ ژێر چاودێری ‌دایه‌.
........
سه‌رچاوه‌ .. / ویکیپیدیا